The Sun: 廖偉芬馬露明膠樽珊瑚宣揚保育

Jul 14 2014

海水污染進一步破壞海洋生態，為咗有一個理想嘅海岸環境，向來關注環保嘅廖創興家族後人Jennifer廖偉芬尋日聯同前高官馬時亨嘅囡囡Christine馬露明及多位志願人士，以及二十幾名來自基層家庭嘅小朋友，齊齊到石澳海灘執膠樽，並且發揮創意將膠樽廢物利用，由設計師指導下經各人聯手上色，成為一件七彩繽紛嘅珊瑚礁裝置藝術。

愛好潛水嘅Jennifer話好擔心香港嘅海洋生態，發覺本地水域污染嚴重，海底下可謂了無生氣。佢聽啲潛水前輩講，四、五十年前香港嘅水域係可以見到珊瑚，但依家想睇到美麗嘅珊瑚，就要到鄰近地區潛水喇。不過，地球污染愈來愈嚴重，相信將來要去到更遠嘅地方潛水先觀賞到珊瑚。

至於今次將膠樽製成嘅珊瑚礁裝置藝術，Jennifer話希望大家可以反思自然物種嘅消失，到底人工物品能否取代呢？Christine亦曾經到外國觀賞壯麗嘅水底世界，十分認同海洋環境極需保護。